इंदिरा संत आणि पद्मा गोळे या कवयित्रींच्या कविता म्हणजे साहित्यप्रेमींसाठी एक वेगळीच पर्वणी असते. ‘बाइट्स ऑफ इंडिया’च्या विशेष उपक्रमात या दोन्ही कवयित्रींची एकेक कविता आपल्यासमोर सादर केली आहे रत्नागिरीतील मुक्त पत्रकार, लेखिका ज्योती अवसरे-मुळ्ये यांनी...
...........
पुस्तकांतली खूण कराया

पुस्तकांतली खूण कराया
दिले एकदा पीस पांढरे;

पिसाहुनि सुकुमार कांहिसे
देतां घेतां त्यांत थरारे.

मेजावरचे वजन छानसे
म्हणुन दिला नाजूक शिंपला;
देतां घेतां उमटे कांही
मिना तयाचा त्यावर जडला.
 
असेच कांही द्यावे घ्यावे
दिला एकदा ताजा मरवा;
देतां घेतां त्यातं मिसळला
गंध मनांतिल त्याहुन हिरवा.
- इंदिरा संत
(इंदिरा संत यांची पुस्तकं ‘बुकगंगा डॉट कॉम’वरून घरपोच मागविण्यासाठी https://goo.gl/Z76F3v येथे क्लिक करा. इंदिरा संत यांच्या निवडक कविता अन् त्यांवरचे लेख वाचण्यासाठी https://goo.gl/QsYZPi येथे क्लिक करा.)
.............
मी घरात आले

उंबऱ्यावरचे माप सांडून
मी आत, घरात आले,
दोन डोळ्यांतली ज्योत झाले,
माझे डोळे खाली वळले.
भुई म्हणाली, ‘तू माझी!
काढ केर, स्वच्छ कर.’
मी म्हटलं, ‘खरंच गं आई’
केरसुणी झाले, रांगोळी झाले.

चूल म्हणाली, ‘तू माझी.’
मी तिची लाकडं झाले.
जातं म्हणालं, ‘तू माझी.’
गहू झाले, ज्वारी झाले.
उखळीतलं भात झाले;
ताकातली रवी होऊन
मथणीत नाचत राहिले.

भिंत होऊन, छप्पर होऊन,
गुपितं राखली, छिद्रं झाकली;
पणती, वात, तेल होऊन
कोनेकोपरे उजळून टाकले.
सून झाले, बायको झाले,
आई झाले, सासू झाले,
माझी मला हरवून बसले.

आता सोंगे पुरे झाली;
सारी ओझी जड झाली.
उतरून ठेवून आता तरी
माझी मला शोधू दे;
तुकडे तुकडे जमवू दे.
विशाल काही पुजू दे.
मोकळा श्वास घेऊ दे.
श्वास दिला, त्याचा ध्यास
घेत घेत जाऊ दे!
- पद्मा गोळे

(मराठी राजभाषा दिनानिमित्ताने ‘बाइट्स ऑफ इंडिया’वर प्रसिद्ध झालेले सर्व लेख, कविता आणि व्हिडिओ https://goo.gl/qgDdWU या लिंकवर एकत्रितरीत्या उपलब्ध असतील.)